RUTA PRG-202, homologada en 2017. Sendeiro de percorrido circular. O punto de inicio sitúase no Campo da Feira de Bembibre, continuando cara ao Rial e o Carqueixal. Prosigue dirección sur ata a Capela de San Xoán e os montes de San Román. Desde aquí o camiño toma rumbo oeste para atravesar a aldea de Gontar e, unha vez cruzado o rego do mesmo nome, acadar a zona do Rexedoiro e a fervenza. Posteriormente continúase dirección sur cara ao lugar de Ínsua collendo as sendas de pescadores e camiños paralelos ao río Dubra ata chegar ao punto de partida previo paso novamente pola Capela de San Xoán. Tres pequenos tramos do percorrido son coincidentes á ida e á volta.

De interese

As carballeiras de carballo común (Quercus robur) son as principais formacións de bosque autóctono presentes nesta ruta. Ademais, tamén é habitual ver asociadas outras especies como cerquiños, sobreiras, acivros, castiñeiros ou loureiros, así como campos de cultivos, pradarías, matogueiras de toxo, xesteiras e zonas de repoboación.

A Capela de San Xoán Bautista, situada nunha zona despoboada de monte da parroquia de Coucieiro próxima a Bembibre, foi construída no século XVII sobre un posible templo medieval.

En canto ás vivendas tradicionais, destacan as de planta rectangular formando conxunto con outras edificacións auxiliares de tipo agrícola e gandeiro como fornos, cortes, palleiras ou alpendres. As casas, pertencentes á tipoloxía das agras coruñesas, están construídas en pedra e adoitan presentar planta baixa e unha altura con tellado a dúas augas coa estrutura de madeira cuberta de tella do país.