A Asociación Terras de Compostela, encargada da xestión do Xeodestino Terras de Santiago, organiza nos próximos meses un programa de experiencias de ecoturismo e benestar que ten como finalidade avanzar no posicionamento deste territorio como un destino turístico sostible e de calidade en Galicia.

O programa de experiencias consisten nun conxunto de actividades deseñadas a partir dos valores xerais do Xeodestino Terras de Santiago cos que xa viñan traballando en anos anteriores como son, a natureza e o patrimonio do territorio; ao que suman neste 2026 novas tendencias de demanda como é a busca do benestar físico e emocional para as actividades dos momentos de lecer.

Un programa de experiencias que abarca “gastronomía, benestar e tradición”   para os once concellos que conforman o territorio do xeodestino: Ames, A Baña, Boqueixón, Brión, Negreira, Padrón, Rois, Santa Comba, Teo, Val do Dubra e Vedra. Durante os meses comprendidos entre maio e novembro (ambos incluídos) haberá actividades para que as persoas participantes descubran a gastronomía do xeodestino a través de showcookings e catas sensoriais. Desconecten da vida diaria e conecten cos valores do territorio a través de paseos conscientes na natureza. Descubran e sintan os valores culturais e naturais a través de rutas no Camiño de Santiago ao son da música en directo.

Esta oferta complétase con actividades dirixidas a tódolos públicos e especialmente para familias onde a proposta é descubrir a historia dun lugar a través do xogo. Ao mesmo tempo que se comparte tempo de calidade en familia e con outras familias.

A información sobre as actividades e o proceso de inscrición publicarase a través das redes sociais do Xeodestino Terras de Santiago e de cada un dos concellos onde se desenvolvan cun cartel individual no cal se indicará: o lugar, a hora e o público ao que vai dirixido, persoas adultas ou tódolos públicos.

Experiencias de ecoturismo para descubrir paisaxes, gastronomía e tradición, vivir momentos de calma e benestar nas terras de Santiago!