O parque de Galeras esténdese ao longo das marxes do río Sarela sobre un terreo case plano no que se xunta co regato Corgo. Esta valgada delimítana polo oeste a Finca do Espiño —frondosa e con romántico palacete modernista, que conta con merendeiros— e o monte Pío —onde está a residencia do presidente da Comunidade Autónoma de Galicia—, e polo leste a cidade monumental. Marca, por tanto, o límite entre a cidade e o contorno natural.

Galeras é sobre todo un gran prado, moi adecuado para o paseo, o xogo infantil e a práctica deportiva, que ten ademais nos seus bordos varias arquitecturas de autor, e cafetarías e restaurantes con vistas sobre o parque. Da Finca do Espiño, destacar ademais as súas vistas da cidade, da contorna e do solpor.