Encontro Local “Comedores Responsables Km0”

O programa Comedores Responsables KM 0 inicia o seu percorrido en Ames co primeiro encontro no GDR Terras de Compostela

O pasado 1 de outubro celebrouse no Pazo da Peregrina, en Ames, o primeiro encontro do programa Comedores Responsables KM0, unha iniciativa que busca promover un modelo de alimentación máis saudable, sostible e de proximidade nos comedores escolares, residencias e centros de día.

O acto de presentación contou coa participación do alcalde de Ames, responsables de AGACAL e representantes doutras institucións, ademais da asistencia de cociñeiros escolares, provedores locais e profesionais de entidades sociais vinculadas directamente ao día a día dos comedores. A súa presenza puxo de manifesto o interese e a necesidade de avanzar cara a un modelo alimentario que reduza a pegada ecolóxica, impulse o consumo de produtos de proximidade e contribúa ao desenvolvemento do medio rural galego.

Durante a súa intervención, as persoas responsables subliñaron a importancia de que este proxecto chegue ao conxunto de Galicia, pois trátase dun programa con vocación de permanencia que se estenderá ata o ano 2027. Un tempo no que se traballará conxuntamente con centros escolares, entidades e produtores para garantir que a transición cara a unha alimentación responsable sexa progresiva, viable e beneficiosa para toda a sociedade.

Ademais da presentación institucional, a xornada serviu como espazo de diálogo e colaboración. Organizáronse reunións e dinámicas de traballo entre responsables de comedores, provedores e persoal técnico, nas que se analizaron retos e oportunidades, e se puxeron en común experiencias previas. Estes encontros permitiron dar os primeiros pasos na construción dunha rede de colaboración estable que favoreza o intercambio de coñecementos e recursos, facilitando a implantación do proxecto.

Dende a organización, quíxose agradecer expresamente a asistencia do público, así como a implicación das persoas participantes, destacando que o éxito de Comedores Responsables KM 0 depende en boa medida da colaboración activa entre institucións, profesionais da cociña, familias e o tecido produtor galego.

Este foi o primeiro dunha serie de encontros que continuarán ao longo do mes de outubro nos diferentes GDR de Galicia, co obxectivo de dar a coñecer en detalle o funcionamento do programa e involucrar a todos os colectivos interesados. Así, o proxecto avanza consolidando unha folla de ruta común para construír comedores máis sans, máis próximos e máis sostibles, co beneficio engadido de mellorar a calidade de vida das persoas usuarias e apoiar ao sector agrogandeiro e pesqueiro local.