O río Tambre, no treito medio da súa bacía, conserva interesantes valores ambientais que o fixeron merecedor de ser incluído na Rede Natura 2000, unha rede europea de espazos naturais que deben ser preservados pola súa contribución á biodiversidade comunitaria, tanto de hábitats naturais como de especies de flora e fauna.

O treito incluído na zona protexida, definido como Lugar de Interese Comunitario (LIC), discorre entre a confluencia do río Maruzo, en Frades e o río Sionlla, xa en Santiago de Compostela; ademais, outros afluentes como o Sanmo, o Lengüelle e varios pequenos tributarios destes. No treito protexido, do que esta senda percorre a parte máis meridional, o río Tambre discorre por unha zona relativamente chaira, con escasa pendente.

O Tambre tamén é o un río de grande importancia para Santiago de Compostela por abastecer de auga potable ao concello (á potabilizadora está precisamente moi preto da área recreativa de Chaián, augas abaixo). As súas augas, unha vez usadas e despois de depuralas, volven ao outro río, o Sar, que xa pertence á bacía do Ulla.